LAPSAG SANG GINAPATIHAN NPA GINTURN-OVER SA TALISAY SWDO

Share on facebook
Share on google
Share on pinterest
Share on twitter
Share on print

Gin kumpirmar ni Lt. Norman Sorila Civil Military Officer sang 72nd Infantry Battalion nga na turn-over na sang ila tropa sa City Social Welfare and Development Office ang duha ka bulan nga lapsag nga gin alegar bata sang isa ka Iloy nga miyembro sang New People’s Army nga nagpalagyo sa operasyon nga ila gin patigayon sa Hacienda Ambulong, Brgy. San Fernando syudad sang Talisay.

Suno kay Sorila, base sa panaysayon sang pila ka mga residente sa lugar nga amo man mismo ang naghatag sang impormasyon sa Militar angut sa presensya sang amo nga grupo, ang iloy sang lapsag ang gin kilala kay Alias Jandy base man sa pagpakilala sini sa komunidad.

Dugang pa ni Sorila, ang ila operasyon ang resulta man sang mga reklamo nga ila nabaton gikan sa mga pumuluyo sa lugar nga nangin biktima sang extortion activity sang rebelde nga grupo.

Sa pihak nga bahin, gin klaro man sini nga naka pauli na sa ila puluy-an ang mag asawa nga sibilyan nga ila gin pangabay sa pag dala sang lapsag sa syudad agud ma turn over sa natungdan nga ahensya sang gobiyerno. | Aksyon Art Tayhopon

DOH MAGAPATIGAYON SANG SITE INSPECTION SA POSIBLE PATUKURAN SANG BACOLOD GENERAL HOSPITAL

Magapadulong ang DOH sa syudad sang Bacolod para sa site inspection sa lugar nga posible pagatukuran sang Bacolod General Hospital.

Ini matapos nga damlag lang, ginpabalo sang DOH si Congressman Greg Gasataya nga ginlakip na sang Department of Budget and Management ukon DBM ang pondo para sa pag tukod sang hospital sa 2022 National Expenditure Program.

Suno kay Gasataya, tinalikdan nga semana sang ginpabalo siya sang DOH nga luyag nga magpadulong sa Bacolod para sa site inspection pero wala pa sang pat-od nga petsa.

Nagpangabay man si Gasataya sa DPWH kag DOH nga mag himo sang perspective sang hospital bilang preparasyon sa natalana nga budget deliberation sang kongreso.

Suno sa Kongresista, indi pa niya mapalayag ang mga lugar nga posible tukuran sang hospital pero nagapabilin pa nga bukas sa tion nga may luyag pa nga magtanyag sang propedad.

NEGROS OCCIDENTAL NAKARECORD SANG MANUBO NGA ACTIVE COVID-19 CASES SANG ISA KA SEMANA

Isa ka semana nga nakarekord ang Negros Occidental sang sunod sunod nga pagnubo sa aktibo nga kaso sang coronavirus disease (COVID-19).

Sa datos sang Provincial Incident Management Team (PIMT), nag umpisa ang pagnubo sang Hulyo 21, 2021 sa diin ang kaso naglab-ot sa 1,613 halin sa 1,623 sang Hulyo 20.

Ini ang nagpadayon sa sulod sang pito ka adlaw tubtub nga nangin 1,349 na lamang sang Hulyo 27.

Ginpahayag ni Provincial Administrator Atty. Rayfrando Diaz II, nagnubo naman ang occupancy rate sang mga district hospital sa probinsiya.

Nagapati si Diaz nga resulta ini sang mass vaccination nga ginpatigayon kontra COVID-19. | Aksyon Marlon Genovea

MORE STORIES:

LIKE US ON FB

error: Ooops... You are not authorized to copy this content.