Ginaduso ni Bacolod Mayor Evelio Leonardia ang face-to-face nga debate batuk sa iya kasumpong sa pagka alkalde nga si anay 3rd district Congressman Albee Benitez.
Ang U.P Law Alumni Association-Negros Occidental Chapter ang nag organisar sang “Debate Eleksyon 2022” Mayoral kag Gubernatorial Debate sa maabot nga Enero 15.
Suno kay George Zulueta, Mayoral Debate Coordinator ni Leonardia, ang debate ang kuntane patigayunon sa University of St. La Salle base sa orihinal nga plano pero base sa mechanics nga ila nabaton, ang debate ang mangin virtual na lamang.
Bangud sini, nagpadala si Zulueta sang sulat sa organizer paagi kay Atty. Ramon Antonio Pandan sang UP Law Alumni Association – Negros Occidental, nga nagapabutyag nga ibalik ang live one-on-one debate format sa diin naga atubangay ang mga debater sa stage nga may Facebook live coverage kag zoom.
Suno kay Zulueta, sa face-to-face debate, wala sang notes, wala sang cellphone, wala sang teleprompter kag wala sang coaching para sa transparency.
Ginpahayag ni Zulueta, ini man ang format sang CNN Debate nga Town Hall Meeting.
Samtang, bukas man si Bacolod Mayoralty candidate Albee Benitez sa face-to-face nga debate sa maabot nga Sabado.
Sa statement, ginpahayag ni Benitez, nga gin imbitar lamang ini sa nag organize sang debate nga naga tuyo sang voter’s education.
Suno kay Benitez, masunod ini sa format kag mechanics sang debate organizers.
Dugang pa sang anay Kongresista, handa ini nga mag atubang sa bisan sin-o kag bisan diin para ma istoryahan ang mga problema kag mga concern sa syudad sang Bacolod.
Ini ang ginpagwa nga statement ni Benitez matapos nagpadala sang sulat ang kampo ni Leonardia sa organizer sang debate nga nagapangabay sang face-to-face debate.
