Ginapadalman sang Police Station 1 ang imbestigasyon sa gin alegar pagholdap sa liaison officer sang Negros Occidental Teachers Federation (NOTF) kag nakuha ang 600,000 pesos nga kwarta sa sulod sang parking area sang Negros First Cyber Center, syudad sang Bacolod takna las 11 sang aga kahapon nga adlaw, Mayo 19.
Suno kay Police Major Ramel Sarona, hepe sang Police Station 1, bag-o lang halin sa landbank ang biktima nga lalaki kag manugsakay na sa salakyan sa parking area sang gin alegar, ginholdap.
Upod sang biktima ang duha ka mga lalaki nga nagahulat sa salakyan.
Nagwa sa inisyal nga imbestigasyon nga ang suspek nga nagkuha sang kwarta ang naka helmet kag naka jacket samtang may isa pa ka lalaki nga nag serbe nga lookout kag nagahulat sa motorsiklo nga amo ang ila ginsakyan sa pagpalagyo.
Apang, ginpakita sa lima ka angulo sang CCTV footages nga wala sang komosyon sang ginkuha ang kwarta kag wala man nagpangayo bulig ang biktima bisan nga may gwardya kag may mga tawo sa lugar.
Nakita man sa CCTV nga dungan nagsulod ang ginsakyan sang biktima kag ang motorsiklo sang mga suspek kag dungan man nga nagwa sa lugar matapos ang insidente.
Gina usisa na ang gin alegar nagalain-lain nga statement sang biktima kaangay sang una nga deklarasyon nga 1.6 million pesos ang nakuha, pero sa ulihe yara sa 600,000 pesos ang nakuha.