Narekober sang otoridad ang lima ka banyera sang isda nga gin-aligar ilegal nga ginpanagat sa baybayon sang syudad sang Cadiz.
Una nga nakabaton sang report ang Bureau of Fisheries and Aquatic Resources (BFAR)-6 nga may idul-ong nga dynamited fishery products sa Sitio Sibucao, Barangay Banago syudad sang Bacolod.
Bangud sini, nag patigayon sang joint land-based operation ang BFAR-6 kag Philippine Coast Guard (PCG)-Negros kag nakumpiskar ang lima ka mga banyera sang isda nga “Bagudlong”.
Suno kay PCG-Negros Commander Jansen Benjamin, ginpaidalom sa examination ang isda kag nakumpirmar nga ini ang nakuha gamit ang dinamita.
Gindakop ang tag-iya sang mga isda nga si Anmer J. Dioso, 44 anyos sang Sto. Tapon, Pandanan syudad sang Sagay nga naglapas sang Section 126 sang Republic Act 8550 ukon ang Philippine Fisheries Code of 1998 kag nagbayad sang penalidad nga ginabulubanta 20 mil pesos.
Ang mga isda ang ginturn-over sa Holy Family Homes, Inc. sa Barangay Cabug, Bacolod.
Ginkumpirmar ni Benjamin ang report nga may mga mananagat nga nagagamit sang dinamita ukon lupok sa pagpangisda sa baybayon sang Cadiz kag isa ini sa karon sang ila gina tutukan. | Aksyon John Diaz
