Apat sa lima ka mga local government units (LGUs) sa Western Visayas nga wala pa makasumiter sang complete liquidation reports para sa social amelioration program (SAP) bangud sa COVID-19, ang halin sa Negros Occidental.
Suno kay Department of Social Welfare and Development (DSWD) Region 6 Director Ma. Evelyn Macapobre, ini nga mga LGUs amo ang Roxas City sa Capiz, syudad sang Himamaylan, Silay, Sagay kag banwa sang Manapla sa Negros Occidental.
Dugang pa ni Macapobre nga sandig sa memorandum circular no. 9 sang DSWD, nasaad nga dapat masumiter sang mga LGUs ang amo nga report, 15 working days matapos makompleto ang SAP payout.
Suno kay Macapobre, natapos na ang payout sa una nga tranche sang SAP sadtong Mayo 27.
Ginpanugyan sang Regional Director sa sini nga mga LGUs nga makig-angot sa ila talatapan, agud magpabalo sang rason kun ngaa naatrasar ang pagsumiter.