Pabor ang League of Provinces of the Philippines (LPP) sa pagpaisol sa barangay kag Sangguniang Kabataan (SK) elections sa Oktubre 2023.
Suno kay Negros Occidental Governor Bong Lacson, isa ini sa mga topiko nga gintalakay sa ginpatigayon nga 2nd LPP General Assembly sa syudad sang Koronadal South Cotabato nagligad nga Setyembre 30.
Dugang ni Lacson, pagahulaton na lamang nila nga mga gobernador ang pagpirma ni Presidente Bongbong Marcos Jr. sa hagna.
Nagligad nga Miyerkules ginratify sang Kamara ang bicameral conference committee report sang hagna, antis isumiter sa Malacañang para pirmahan ni Presidente Marcos.
Ang House Bill No. 4673 ang nagatalana sang brgy. kag SK elections sa una nga Lunes sang Desyembre 2023, samtang ang Senate Bill No. 1306 ang nagatalana naman sa ikaduha nga Lunes sang Desyembre 2023.
Apang ginkasugtan sang bicameral conference committee nga italana ang eleksyon sa katapusan nga Lunes sang Oktubre 2023. | Aksyon Marlon Genovea