Patay ang mag-abyan matapos ginbuno sa Purok Pili, Brgy 6, syudad sang Kabankalan ala una pasado kaina sang aga, Enero 27.
Ang mga biktima ginkilala kanday Erwin Colorado, 22 anyos sang Prk. Masinadyahon, kag isa ka 16 anyos nga sultero residente sang Prk. Baganihan B, tanan sang Brgy Binicuil, Kabankalan.
Suno kay Police Captain Dennis Melgarejo, ang duha ang positibo nga ginkilala sang ila mga himata.
Dugang pa ni Melgarejo, sa post mortem examination nga ginpatigayon sang mediko legal, ang menor de edad ang nakaangkon sang 21 ka buno sa likod ang iya lawas kag 5 pa sa dughan samtang si Colorado ang nakaangkon naman sang 7 ka pilas sa likod sang lawas kag 10 pa ka malubha nga pilas sa dughan.
Sa karon may person of interest na ang kapulisan sa syudad sang Kabankalan apang nagpamalibad sa paghatag sang ngalan bangod nagapadayon pa ang man hunt operation.
Indi pa matumod ni Melgarejo ang motibo sa pagpatay sa duh aka mga biktima. | Aksyon Alvin Grava
