Patay ang mag-live-in partner sa natabo nga pagpangluthang sa Sitio Calango, Barangay Iglau-an, banwa sang Murcia mga las 2 sang kaagahon, sabado, Nobyembre 18.
Suno kay Police Executive Master Seargeant Benjie Silva, Deputy Chief of Police sang Murcia PNP, ang mga napatay ginkilala nga sanday Feliciano Leagoso, 45 anyos kag Susan Hiliwagan, 57 anyos.
Dugang pa ni Silva, may mga person of interest na sa natabo nga pagpatay apang wala ginhatag ang detalyi tungod sa nagapadayon nga imbestigasyon.
Naggwa sa inisyal nga imbestigasyon nga away sa ginabantayan nga duta ni Leagoso ang rason sang krimen.
Una diri, gin-report sa kapulisan nga nasapwan na lamang nga patay si Leagoso malapit sa kudal kag sang gin usisa, nakit-an man ang bangkay ni Hiliwagan sa sulod sang kamalig nga ila ginatiniran.
Narecover ang pila ka bala sang 12 gauge shot gun kag kalibre 45 nga armas luthang sa lugar sang insidente.
PAHAYAG SANG HIMATA SANG BIKTIMA
Nanawagan si Gina, utod sang napatay nga si Feliciano Leagoso sa mga may kahimuan sang krimen nga magsungka na sa otoridad agod mahatagan sang hustisya ang kamatayon sang ila himata.
Dismayado si Gina sa ginhimo sa ila utod matapos gin alegar nga caretaker lamang ini sang hacienda nga ginapanag-iyahan ni Jun-Jun Makilan.
Pagsaysay ni Gina, antes pa ang insidente, naistorya na sa ila ni Feliciano ang isyu sa duta tungod gina-claim sang mga gin-alegar nag-squat sa duta nga ila ang propedad apisar nga ginpa-istar lamang sila sang matuod nga tag iya.
Samtang, ginkumpirmar ni Gina nga nakaagi priso si Feliciano bangod sa ginbaligya nga illegal nga armas kag Nobyembre 10 sang ini ang nakagwa matapos nagpiyansa.
