Patay ang mag-utod matapos ginluthang sa atubang sang opisina nga ginatrabahuan sang isa sa mga biktima sa Lot 3, Block 14, Gonzaga Extension, Doña Juliana Subdivision, Barangay Taculing syudad sang Bacolod.
Ang mga napatay ginkilala nanday Imee Mahilum, 36 anyos kag Aimee Jane Decara, legal ang edad kag lunsay residente sang Purok Kabugwason, Brgy. Mansilingan, syudad sang Bacolod.
Ang ginatudlo nga suspetsado ang ginkilala naman kay Alvin Lanza, legal ang edad kag residente sang Barangay Alangilan syudad sang Bacolod.
Sa imbestigasyon sang mga kapulisan, ginpahayag ni Police Station 6 Commander Police Captain Elmer Bonilla nga takna las 5:30 sang hapon sang papauli na kun tani ang mag-utod sang nagluntad ang pagpangluthang.
Suno kay Bonilla, amo nga oras masami ginasugat ni Decara ang magulang sini sa trabaho.
Dugang pa ni Bonilla, nakasakay na sa Toyota Rivo ang mag-utod sang nagluntad ang komosyon tubtob nga nagresulta sa pagpangluthang.
Pagpahayag ni Bonilla, duha gid lamang ka lupok ang nabatian sang mga saksi sa palibot.
Una nga gintiro si Decara nga amo ang nagamaneho sang salakyan apang sang nanaug ang magulang sini ginluthang man sang suspetsado.
Sa imbestigasyon sang kapulisan, nahibaloan nga mahimo naubsan sang bala si Lanza rasun kun ngaa ginbilin na lamang sini sa sulod sang salakyan sang mga biktima ang gingamit nga kalibre 45 nga armas-luthang.
Suno pa sa hepe, ginbuno ni Lanza ang kaugalingon gamit ang kutsilyo matapos ang krimen.
Dead on the spot ang mag-utod nga babaye samtang padayon naman nga ginabulong sa ospital ang suspetsado.
Problema sa relasyon sang isa sa mga biktima kag sang suspetsado ang isa sa mga ginalantaw nga motibo sang krimen.
Ang suspetsado nagatrabaho bilang mekaniko kag driver sang Tough Star Engineering Works kun sa diin man nagatrabaho bilang personnel sang Accounting Department si Imee Mahilum.
Narekober sa eksena sang krimen ang duha ka mga dugged bullet, duha ka mga naglupok nga bala sang kalibre 45 nga armas-luthang, isa ka magazine nga wala sang bala kag ang kalibre 45 nga armas luthang.
Gin-imbitar man sang mga kapulisan, ang isa ka drayber sang kompaniya matapos makit-an sa lugar sang nagluntad ang krimen.
Sa interview sang Aksyon Radyo Bacolod kay Arnold Aguilar, ginlihog ini sang isa sa mga biktima nga kuhaon ang gamit sini sa opisina agud ibutang sa salakyan sang hinali nalang nga nakabati ini sang duha ka mga lupok.
Aligasyon ni Aguilar, naghingagaw ini guwa kag nakit-an na lamang nga hamyangon sa duta si Mahilum.
Suno kay Aguilar, gintingwaan pa niya nga mahakwat ang napatay abang indi sini madala rasun kun ngaa nagpangayo na gid lamang ini sang bulig sa mga kapulisan nga nagabantay sa gymnasium malapit sa lugar sang krimen.
Ginkumpirmar ni Aguilar nga nakit-an pa niya si Lanza nga nagdalagan padulong sa likod nga bahin sang ila opisina.
