Patay ang mag-tiya sa aksidente nga nagluntad sa Sitio Nato, Barangay Aguisan, syudad sang Himamaylan pasado las 7 sang gab-e, Nobyembre 22.
Ang mga napatay ang ginkilala sanday Mariel Pedro, 19 anyos kag Ledesma Arselia, 46 ang edad kag pareho nga residente sang Purok 8, Barangay Aguisan, sa amo man nga syudad.
Suno kay Police Corporal Mark John Dato, imbestigador sang Himamaylan PNP, nag-agaw sa linya sang sugata nga van ang traysikol nga ginamaneho ni Pedro.
Dugang pa ni Dato, nagtinguha pa nga makalikaw ang van nga ginamaneho ni Kimlou Serenio, 29 anyos sang Barangay San Jose, syudad sang Sipalaya; apang bangud sang kadasigon sang pagpadalagan nalambot gid ang traysikol.
Ginhingagaw pa nga madala sa ospital sanday Pedro kag Arselia apang sila ang ginbawian sang kabuhi.
Pilason man ang 15 anyos nga babaye nga sakay sa traysikol kag karun ginabulong sa isa ka ospital sa syudad sang Bacolod.
Sa karun, priso sa custodial facility sang Himamaylan City PNP ang driver sang van. | Aksyon John Diaz