Liwat nga ginbuksan sa publiko ang Mambukal Resort and Wildlife Sanctuary sa Brgy. Minoyan, Murcia Negros Occidental subong nga adlaw, Disyembre 1, 2021.
Suno kay Governor Bong Lacson, kabahin ini sa tikang sang gobyerno probinsiyal nga mapabangon ang industriya sang turismo sa probinsiya sa idalom sang alert level 2 status.
Sa ginpatigayon nga programa sa soft opening, ginpirmahan ni Lacson ang Executive Order ( EO) No. 21-48 angot sa ” rebranding” sa Mambukal Resort kag pagdeklarar bilang wildlife sanctuary.
Nasaad sa EO nga dapat protektahan ang flora, fauna, endemic kag wildlife species sa sulod sang resort.
Pagadumilian man ang pag-ayam, pagpilas, kag pagpatay sa mga endemic kag wildlife animals sa protected area.
Ang Provincial Environment Management Office ang gindesignar nga amo ang magpatuman sang mga pagsulundan sa idalom sang Forest Management Service, samtang ang Economic Enterprise Development Department Mambukal Division amo naman ang magadumala sang resort kag wildlife sanctuary.
Ginpanugyan sang gobernador sa mga lokal kag dumuluong nga turista nga una magparehistro sa opisina sang Mambukal sa Provincial Capitol Lagoon and Park syudad sang Bacolod, agud mapasiguro nga mapatuman ang protocol nga 70% capacity.
Ginpabalo man ni Lacson nga mangin libre ang entrance fee sa sulod sang pila ka semana, magluwas lamang sa pag-usar sang pasilidad.
Tuig 2020 sang temporaryo nga ginpasira ang Mambukal, bangud ini ang ginhimo nga isolation facility sa mga nagapositibo sa COVID-19.
Kahapon Nobyembre 30, gintugutan na nga maka gwa sa ila isolation facility, ang 2 ka mga nabilin nga COVID-19 positive patients. | Aksyon Marlon Genovea