Patay ang 65 anyos nga mangunguma matapos gintiro sang duha ka wala makilala nga lalaki sa Sitio Tambobo, Brgy. Celestino Villacin, syudad sang Cadiz las 9 sang aga, Sabado.
Ang napatay ginkilala sa kay Diosdado Fuentes, pomuluyo sang Purok Pilar, Barangay Colonia, syudad sang Sagay.
Si Fuentes ang nakaagom sang anom ka pilas sa ulo kag lawas nga amo ang gintunaan sang iya kamatayon.
Sa interview ni Aksyon Roger Gutib sa kay Gabriel Fuentes, bata sang napatay, karabaw kag isyu sa duta ang ila ginalantaw nga motibo sa pagpatay.
Sa ihibalo ni Gabriel, may nagbakal sa ginabusong pa nga bata sang ila karabaw apang sang nakagwa na kag kuhaon sang tag iya, nagpamalibad ang magulang rason nga nahisugtan nga ipasagod na lamang.
Sa isyu naman sa duta, ginapahalin sa iya ginatalauma nga duta ang napatay apang nagpamilit ini nga indi magbiya tungod may balay kag mga pananom na siya sa lugar.
Sa karon, indi matumod ni Gabriel kon ano pa ang mas madalom nga motibo sa pagpatay sa iya amay apang nagalaom nga mahatagan sang hustisya ang kamatayon sang iya ginikanan.
Subong, nagapadayon pa ang pagpangusisa sang kapulisan angot sa insidente. | Aksyon Roger Gutib, Aksyon Ann Defensor
