Pilason ang isa ka senior citizen matapos ginluthang sa Sitio Patol, Brgy Caliling, banwa sang Cauayan las 2 kahapon, Nobyembre 20.
Ang biktima ang ginkilala kay Rogelio Mamigo, 62 anyos samtang ang suspetsado amo naman si Jomar Carmelontes, 41 anyos kag pareho nga residente sang Sitio Patol, Brgy Caliling, sang amo man nga banwa.
Suno kay Police Lt. Raffy Billones, Deputy Chief of Police sang Cauayan PNP, nagapungko sa gwa sang iya nga balay si Mamigo sang ginpalapitan ni Carmelontes kag ginkompronta bangud sang mga nagkalamatay nga manok.
Dugang pa ni Billones, si Mamigo ang ginapasibangdan ni Carmelontes nga nag-hilo sa iya nga mga manok.
Gintiro ni Carmenlontes si Mamigo kag nakaangkon sang pilas sa wala nga bahin sang tiyan.
Nagsungka naman sa kapulisan si Carmelontes kag iya gin turn-over ang isa ka kalibre 45 colt MKIV pistol nga may isa ka magazine.
Sa pina-ulihi nga update, gin-operahan na sa ospital si Mamigo.
Kaso nga frustrated murder ang ipasaka nga kaso batuk kay Carmelontes nga priso karun sa custodial facility sang Cauayan PNP.
