Ginadiskobre sang Bacolod City Police Office City Drug Enforcement Unit ukon CDEU kon sin-o nga persona ang nagadul-ong sang shabu sa downtown area nga ginakuha sang maglive-in partner nga sanday Maria Elirica Celis kag Carlo Purillo nga pumuloyo sang Purok San Roque Uno Barangay Handumanan syudad sang Bacolod.
Si Celis kag Purillo ang nadakpan sa buy-bust operation kaina sang kaagahon, Sabado sa diin narekober sa ila ang 300 gramo sang shabu nga may Standard Drug Price masobra duha ka milyon ka persos.
Suno kay CDEU head Police Capt. Joven Mogato, ila pa ginavalidate kon diin nga gropo si Celis kag Purillo.
Dugang pa ni Mogato, si Celis ang napriso sang 2012 sa kaso nga illegal drugs kag nakagwa sang 2020 matapos ma acquit sa kaso.
Samtang si Purillo ang nadakpan sa kaso nga illegal drugs sang 2018, napriso sang duha ka tuig kag nakagwa matapos mag-apply sang plea bargaining agreement.
Nakita ni Mogato nga amat-amat nagsaka ang demand kag supply sang shabu bangod sa mga fiesta nga ginahiwat sa mga banwa kag syudad sa probinsya sang Negros Occidental. | Aksyon Eric Magbanua
