Nagapanawagan sang hustisya ang pamilya sang mga gin-masaker sa Hacienda Nene, Barangay Bulanon, siudad sang Sagay tinalikdan nga Sabado sang gab i.
Suno kay Bobstel Sumicad, 52 anyos, isa sa tatlo ka mga mangunguma nga nakaluwas sa amo nga insidente, yara sya sulod sang katubuhan para magpamuhin sang nabati-an sini ang sunod sunod nga lupok kag ginpamatay sang wala makilala nga mga armado ang iya sini mga kaupdanan ilabi na ang 17 anyos sini nga bata nga si Marchtel Sumicad.
Samtang hakos ang iya bata, nakita sini ang makasilidni nga sitwasyon sang iya mga kaupdanan, matapos ginluthang gamit ang matag-as nga kalibre sang armas, ginpanglabo kag ginsunog pa ang bangkay gamit ang kansyaha.
Dugang pa ni Sumicad, sabado sang aga gin-arado sang ila grupo ang gintapsan nga mga tubo sa Hacienda Nene sa tuyo kon tani nga tanuman sang mga kararuton para sa ila pamilya, apang pasado alas nuebe sang gabi sang amo man nga adlaw, 9 sa iya mga kaupdanan ang gin masaker.
Bangod sini, nagapanawagan ang pamilya sang mga biktima sa mga opisyal sang Gobyerno nga buligan sila maangkon ang hustisya kag manabat ang responsabli sa pagpatay sa ila mga himata.
