MASSKARA EVENT TODAY: October 18, 2018
- Posted by: News Desk
- | October 18, 2018
- at 8:00 am
COUNCILOR FLOR, GINAPANGABAY SI MAYOR ALBEE NGA MAGPA RE-ELECT BANGUD WALA PA MATAPOS ANG IYA MGA PROGRAMA
Ginpahayag sang duha ka mga konsehal sa syudad sang Bacolod nga wala matalakay ang 2025 elections sa paglakat sang mga kapitan sa HongKong kag Macau.
Ini suno kay Councilors Jason Villarosa kag Celia Flor.
Liwat nga ginpahayag ni Villarosa nga personal ang lakat sang mga kapitan kaupod ang Alkalde. Ginkumpirmar ni Villarosa nga wala nakaupod si Congressman Greg Gasataya samtang may pila ka kapitan ang wala maka upod bangud sa problema sa passport kag iban ang wala naka preparar.
Suno kay Flor, timprano pa nga istoryahan ang eleksyon para sa 2025.
Ginapangabay ni Flor si Mayor Albee Benitez nga mag pa re-elect bangud madamo pa ini sang proyekto nga wala pa matapos.
Luyag ni Flor nga matapos ni Benitez ang mga prayoridad nga mga programa ilabi na ang iya mga ginpromisa sa Bacolodnon.
DUGANG NGA LOTE GIN AWARD SA MGA RESIDENTE SANG BARANGAY 12
Nagsaka na sa 35 ka mga informal settler families (ISF) sa Barangay 12, syudad sang Bacolod ang nakabaton sang award sang lote sa Progreso Village Relocation Site sa Barangay Vista Alegre.
Ginpahayag ni Ma. Christina Samonte, housing and homesite regulations officer V sang BHA Bacolod, may 16 ka ISF nga ma apektuhan sang redevelopment project sang Manokan Country ang nalakip sa ikaduha nga batch nga na- awardan sang relocation site.
Sa karon, may tatlo pa ka mga bag-o nga application gikan sa gihapon sa Barangay 12 ang gin sumiter sa BHA.
Ginpaathag ni Samonte, kadamo sang mga dokumento ang ginasumiter sa ila opisina sang mga ISF kaangay sang BIR, DENR, National Housing Authority, PAGIBIG kag iban pa nga ginalantaw naga pa delay sang application.
Sa nahibaluan, ang mga lote nga gina award sa mga ISF sa karon ang mga ginpangbawi sang LGU bangud wala gin istaran sang malawig nga tion.
Sa record sang BHA, may 64 ka mga ISF sa Barangay 12 ang kwalipikado nga makabaton sang relocation site.