Bwas nga adlaw, Mayo 15, iga pagwa ni Bacolod Mayor Evelio Leonardia ang bag-o nga Executive Order (E.O) nga naga-set sang guidelines sa pag paidalum sang syudad sa General Community Quarantine (GCQ) umpisa Mayo 16.
Si Leonardia ang nag patawag sang emergency meeting subong nga adlaw, Mayo 14 matapos ang bag-o nga palayag sang National IATF nga ang Bacolod nga low-risk area ang dapat ipaidalum sa GCQ base man sa Resolution 35-A.
Suno sa Alkalde, preparado na kuntane ang proposed EO sang syudad para sa Modified General Community Quarantine tubtob nga nagwa ang pinakaulihe nga pronouncement ang National IATF rason nga may refinement pa nga dapat himuon sa guidelines.
Suno kay Leonardia, gina finalize pa sang Exit Planning Team nga gina pamunuan ni Councilor Archie Baribar ang guidelines nga base sa mga pronouncement sang gobyerno nasyunal.
Gin klaro ni Leonardia wala sang pormal nga guidelines nga nabaton ang syudad gikan sa nasyunal sa pagpatuman sang GCQ.
Pero suno sa Alkalde, ang gina balay nga guidelines ang gina base sa polisa nga gin isyu sang Department of Transportation kag Department of Trade and Industry.
Pila sa mga ipatuman sa Bacolod nga gin pahayag ni Leonardia sa interview sang Aksyon Radyo Bacolod subong nga gab-i amo nga maga pabilin ang lockdown sa kada Domingo nga adlaw.
Suno sa Alkalde, ang lockdown ang magahatag sang tsansa sa pumuluyo nga mag family day.
Maga pabilin man suno sa Alkalde ang mga check-up points sa border sang syudad.
Suno sa Alkalde, base sa palayag ni BCPO Director Col. Henry Biñas, amat-amaton naman nga dulaon ang mga inner checkpoint sa syudad.
Ipatuman sa gihapon ang curfew kag ang liquor ban sa tion sang GCQ.
Suno kay Leonardia, cover sang curfew ang tanan nga edad umpisa las 10 sang gab-i tubtob las 4 sang kaagahon.
Ipatuman suno sa Alkalde ang odd-even scheme sa mga salakyan nga may provincial car pass nga maga sulod sa syudad.
Gina discourage ni Leonardia ang mga taga out of town nga wala sang importante nga himoun sa Bacolod nga indi na mag sulod sa syudad.
Balik man suno sa iya ang public transportation pero may restrictions.
Maga isyu man ang syudad sang bag-o nga Home Quarantine Pass kag ini ang maga halin sa Bacolod Government Center.
Suno sa Alkalde, ang bag-o nga HQP ang may control number kag may lima ka ngalan pero one at a time lamang nga makagwa sa balay.
Ang mga naga trabaho naman sa gobyerno ukon pribado ang pwede maka gwa pero ini ang humalin home from work kag work from home lamang.
Suno sa Alkalde, indi pa ma isyu ang bag-o nga HQP sa Mayo 16 rason nga i-honor sa gihapon ang daan nga mga HQP nga una gin isyu sang Barangay.
Nag pangabay si Leonardia as publiko sang pag intiende sa mga polisa nga ipatuman sa syudad bangud indi pwede nga mag salig kag mag kompyansa sa sini nga krisis.
Nag pasalamat ang Alkale sa mga opisyal nga naga panguna sa kampanya kontra Covid-19 sa Bacolod.
Ang syudad ang may 12 ka Covid-19 cases, anum ang naka recover, tatlo ang napatay, kag tatlo ka returning OFWs ang naga pabilin nga positibo. | Aksyon Dale Salazar