Wala gintugutan ni Mayor Renato Gustilo ang pangabay sang San Carlos Bioenergy, Inc. (SCBI) nga ibalik ang operasyon sang bioethanol plant.
Suno kay Gustilo, sang siya ang personal nga mag inspeksyon sa planta wala siya makumbinsir sa ginhimo nga pag akto sang SCBI sa problema angot sa water discoloration, kag malain nga bahu nga gintuga sang waste water storage.
Pebrero 19, 2021, ginmando ni Gustilo ang temporaryo nga pag pauntat sang operasyon sang planta bangud sa madamo nga environmental violations.
Ini ang nag apekto sa baybayon sang Sitio Maloloy-on Brgy. Punao kag ginakabalak-an nga maglapta pa ang halit sini sa mga malapit nga baybayon ilabi na sa isla sang Sipaway nga isa sa mga tourist spot sang syudad.
Nagpaandam si Gustilo nga kun indi masolusyunan ang isyu sa labing madali nga panahon, posible nga magrekomendar ang syudad sa Environmental Management Bureau sang Department of Environment and Natural Resources, nga mag isyu sang cease-and-desist-order.
Nag umpisa ang operasyon sang amo nga planta sang 2008. | Aksyon Marlon Genovea