Ginbubuan sang Barangay Mansilingan sang tubig nga may chlorine ang lima ka mga bomba sa Purok Laurel, Barangay Mansiligan kahapon nga adlaw, Hwebes bilang kabahin sang decontamination kag tikang kontra cholera.
Suno kay Kapitan Rodolfo Pico, dugang nga kapin tatlo tubtob apat pa ka mga bomba sa parehas nga purok ang ipaidalum man sa decontamination subong nga Biernes sang hapon.
Sa nahibaluan, residente sang Purok Laurel ang 37 anyos nga babaye nga una nagpositibo sa cholera pero nakarecover na.
Ginpahayag ni Pico, nga indi pa karon ma establisar kon gikan sa tubig sa bomba sa lugar ang kabangdanan sa pagpositibo sang babaye sa cholera.
Sa impormasyon ni Pico, may yara sang kahiwatan sa lugar kag pagkaligad sang duha ka adlaw, wala na gin init ang pagkaon, kag didto na naglain ang pamatyag sang babaye.
Pero suno sa Kapitan, nagkuha na ang otoridad sang sample sa tubig sa apat ka mga bomba kag isa ka motor pump kag karon ginahulat pa ang resulta sang laboratory.
