MILITAR NATUKIBAN ANG GINAPATIHAN GINAPANAGUAN SANG NPA SA KABANKALAN
Posted by:
News Desk
|
July 23, 2021
at
8:27 pm
Share on facebook
Share on pinterest
Share on twitter
Share on print
Nasulod sang Philippine Army ang ginapatihan ginapanaguan sang New People’s Army ukon NPA kag narekober ang natag-as nga armas kag kagamitan sa Sitio Manulaya, Barangay Tan-awan, Syudad sang Kabankalan kahapon sang hapon, July 22, 2021.
Suno kay Major Cenon Pancito III, Spokesperson sang 3rd Infantry Division sang Philippine Army, nagpatigayon sang combat operation tropa sang gobyerno sang masumalang ang indi magnubo 20 ka armado kag nagluntad ang ginabulubanta 30 minutos nga baylohanay sang lupok.
Ginapatihan nga may pilason sa NPA bangud sa mga tinagas nga dugo sa gin-agyan sang mga ini sa pagpalagyo.
May isa ka miyembro sang Philippine Army ang napilasa apang yara na sa maayo mga kondisyon.
Narekober sang tropa ang isa ka M16 A1 rifle; apat ka short magazines kag ammunitions; IED components; isa ka M16 handguard; isa ka jungle hammock; isa ka bolo; tatlo ka ponchos; isa ka libro; isa ka civilian backpack; nagkalain-lain nga bayo nga may Paghimakas NPA logo; isa ka pares sang rain boots; mga tsinelas; isa ka stub sang dagum; pito ka kilo sang mais; kag P105.00 nga kwarta.
Madumduman, tinalikdan nga adlaw may enkwentro man sa Barangay Caningay, Banwa sang Candoni, Negros Occidental. | Aksyon Bryan Morden
Nakarekord ang Negros Occidental sang isa ka patay bangud sa pertussis disease.
Suno kay Provincial Health Officer Dr. Ma. Girlie Pinongan, napatay ang bata nga pasyente samtang naka-admit sa Doña Corazon Locsin Montelibano Memorial Regional Hospital nagligad nga semana, antis mag-gwa ang resulta sa specimen laboratory examination.
Dugang ni Pinongan, may kabug-usan na nga lima ka mga kaso ang probinsiya, lakip na ang pasyente nga napatay, lima ka mga specimen nga nag-negatibo kag 26 nga probable cases.
Ginklaro ni Pinongan nga kontrolado sa gihapon ang kaso, kag nagalaum nga indi na magdamo pa samtang ginahulat ang pag-abot sang Pentavalent vaccines.
Ginpanugyan ni Pinongan sa mga ginikanan nga indi na pagdal-on sa mga matawo nga lugar ang kabataan, agud indi madapuan sang amo nga masakit.
Pinakatigulang nga pasyente sang pertussis disease sa Negros Occidental, ang naga-edad sang 62 anyos.
Ginakonsiderar ni Mayor Albee Benitez nga i-terminate ang kontrata sang joint venture agreement sa tunga sang Primewater kag BACIWA ukon re-negotiation.
Sa press conference, Lunes, ginpahayag ni Benitez nga nagpangayo ini sa BACIWA sang listahan sang mga bayolasyon sang Primewater sa ginsudlan nga kontrata.
Isa sa ginbasehan ni Benitez nga bayolasyon amo ang section 5.1.2 sang kontrata, nga sa sulod sang lima ka tuig halin 2020, dapat masiguro ang 24 oras nga tubod sang tubig sa katapusan sang ikaduha nga tuig, nga tubtob karon wala na comply.
Ginapasabat ni Benitez ang BACIWA kon ano ang ila nga nahimo sa mga bayolasyon sa kontrata kag kon may penalidad nga ginpapanaug batuk sa Primewater.
Nagapangayo man si Benitez sa BACIWA sang water security plan nga indi lamang sabat sa epekto sang El Niño kundi diin tubtob ang water supply sang syudad.
Suno sa Alkalde, naga claim ang BACIWA nga 90 million liters a day (MLD) lamang ang kinahanglan sang Bacolod pero 125 MLD ang ginarekomendar sang mga eksperto para sa syudad matapos ang ginpatigayon nga verification.
Ginaduso ni Benitez nga may yara sang buffer plan sang tubig ang syudad kag nagsuhestyon nga ang mga deep wells sang Primewater ang dapat reserba sa tion sang emerhensya kag indi ini pag himuon nga primary source of water.
Liwat nga ginpakamalaot ni Benitez ang mga bag-o nga post sa social media nga nagapakita sa malubog nga tubig kag ang suhestyon nga ilisan na ang madaan nga mga tubo.
Bangud sini, nagapahayag si Benitez nga wala sang concrete investment ang Primewater para mapaayo ang ila serbisyo matapos ang apat ka tuig.
Ginklaro ni Benitez nga ‘done deal’ na ang JVA sang Primewater-Baciwa antes ini nagpungko bilang alkalde sang Bacolod.
ALBEE: WALA PA SANG MAY NAPIRMAHAN NGA KONTRATA MATAPOS ANG WATER SUMMIT
Tubtob karon wala sang kontrata nga nakita si Mayor Albee nga ginsudlan ang Baciwa-Primewater kaupod ang water supplier matapos ang water summit nagligad nga Enero 2024.
Ginpahayag ni Benitez, may mga water supplier nga nagahimo karon sang inisyatibo nga mag install sang mga water pipes bisan wala pa sang ginkasugtan nga kontrata.
Suno kay Benitez, may mga verbal agreement pero wala sang may nakita nga signed contract nga gin promisa sa iya nagligad nga water summit.
Una na nga ginkasugtan sa water summit nga ma deliver sang Baciwa-Primewater ang 20MLD nga shortage sang tubig sa sulod sang anum ka bulan.
Ang injection point 2 sang Bacolod Bulk Water Incorporated sa Murcia ang target makadeliver sang 15 million liters a day samtang magahalin naman sa spring water sa Barangay Alangilan ang dugang nga 5 million liters per day.
May proposal man nga magtukod sang water supply kag filtration facility kag maka deliver sang dugang nga 20MLD halin sa Matab-ang river.
