Patay ang 21 anyos nga driver sang motorsiklo matapos malapakan sang 10-wheeler truck sa banwa sang Murcia kaina sang hapon, Myerkules.
Ang napatay ginkilala sa kay Andrie Ditching, residente sang Prk.Ipil-Ipil, Brgy.Blumentritt, banwa sang Murcia.
Suno kay Police Corporal Virgil Semido, traffic investigator sang Murcia PNP, ma-overtake kuntani si Ditching sa duha ka truck nga naga-guyuday kag kargado sang tubo apang na alang bangod may naga park nga salakyan sa unahan rason nga ini ang nagbalik sa linya.
Dugang pa ni Semido, magapatunga kuntani sa duha ka 10-wheeler truck si Ditching apang wala sini makita nga may tow bar rason nga nakabunggo, natumba kag nalapakan sang ginaguyod nga salakyan.
Ang duha ka driver sang Isuzu 10-wheeler truck amu sanday Espiridon Albancis,58 anyos residente sang Brgy.Guimbala-on syudad sang Silay kag Larry Salanatin, 53 anyos residente naman sang E.Lopez , syudad sang Silay.
Ang duha yara karon sa kustodiya sang Murcia PNP kag nagahulat sa desisyon sang pamilya angut sa resettlement. | Aksyon Zil Menardo | Murcia PNP Photos