Naghangyo sang konsiderasyon sa gobyerno probinsiyal ang tagdumalahan sang Negros Cooperative Bank ukon (NCB) sa sulod sang Capitol Park and Lagoon dalan North-Capitol syudad sang Bacolod.
Sa statement nga ginpadala sang Chairman of the Board nga si Nestor Bayona sa capitol media, iya ginsiling nga ang nagtaliwan na nga si anay Governor Joseph Marañon amo ang nagpatukod sang bangko kag ginapanag-iyahan sang cooperative primaries.
Suno pa kay Bayona, libre man nga makagamit sang pasilidad ang bangko bilang suporta sang gobyerno sa kooperatiba.
Dugang pa ni Bayona, luyag ni Marañon nga hatagan sang mahapos nga pamaagi ang mga kooperatiba agud makautang sa manubo nga interest.
Sadtong Oktubre 22, nagpasar sang resolusyon ang Sanguniang Panlalawigan agud hatagan sang otoridad si Governor Eugenio Jose Lacson, nga makamando sa NCB agud maghalin sa 526 metro kuwadrado nga propiedad sang probinsiya, matapos matukiban nga wala nagabayad sang bill sa tubig kag elektrisidad sa sulod sang dose (12) ka tuig.
Handa nga pamatian ni Lacson ang apelasyon sang NCB sa isyu.
Suno kay Lacson ila ipatawag ang mga opisyal sang banko, agud pangabayon nga magpaathag sa isyu.
Nagapati ang gobernador nga may pagsupak nga nahimo sa ginpirmahan nga deed of usufruct sa tunga sang gobyerno probinsiyal kag NCB angot sa paggamit sang 526-metro kwadrado nga propiedad sa sulod sang Capitol Park and Lagoon.
Una diri ginpahayag ni Board Member Andrew Montelibano nga may breach of contract kag conflict of interest nga nahimo ang banko, bangud ang Chairman of the Board sini nga si Nestor Bayona, ang nagaserbe man bilang provincial consultant sang Marañon administration. | Aksyon Marlon Genovea
