Nadakpan sang katapo sang Bacolod City Police Station 8 ang isa ka ginakabig nga notorious nga kawatan sa Brgy. Singcang sa isa ka bakante nga lote kun sa diin diri nila mismo ginasunog ang mga cable wires nga gikan sa battery sang PLDT agud makuha ang saway kag ginapakilo.
Suno kay Police Major Joery Puerto, hepe sang Police Station 8 ang nadakpan nga si Joel Reunin, 21 anyos, nga kilala na nga kawatan sa nasambit nga Barangay.
Dugang pa ni Puerto, may yara sang duha pa nga kaupdanan nga lalaki nga taga Handumanan si Reunin apang nakapalagyo sakay sang motorsiklo.
Narekober sa suspek ang duha ka Battery nga gina panag-iyahan sang PLDT Telecommunication kag isa ka sachet sang ginasuspetsohan shabu kalakip ang toother nga may yara pa residue sang ilegal nga droga nga ginabulubanta may kabug-aton sang masobra isa ka gramo.
Palayag sang hepe madamo na sang blotter si Reunin angut sa pagpamahog sa amay sini, pagpangastigo sa iya nga utod kag pagpangawat.
Dugang sang hepe isa sa ginapakilohan sang mga suspek ang sa dalan Mabinay nga junkshop sa diin yara sa 380 ang kada kilo sang saway.
Suno pa kay Puerto, maga-report ini sa New Government Center agud mahatagan aksyon ang kasubong nga insidente. | Aksyon Zil Menardo
