Natalana nga liwat nga mag operate ang Bacolod Anti-Smoking Task Force sa syudad sang Bacolod kasunod sang Executive Order No. 34 nga gin isyu ni Mayor Albee Benitez nga nagapa reconvene sang task force.
Sa idalum sang EO, si Benitez ang maga serbe nga chair sang Task Force samtang Vice-Chair naman si Councilor Simple Distrito, chair sang committee on social services kag may pila ka mga miembro.
Ang Task Force ang base sa ordinansa nga gin author ni anay Konsehal Atty. Caesar Distrito.
Sa media interview, ginpahayag ni Councilor Simple, nga may yara na sang mga persona nga nagabug-os sang task force kag magatutok ang operasyon sa mga ekswelahan, malapit sa hospital, mga public parks, merkado kag mga enclosed area.Ginpahayag sang Konsehal, nga tuyo sini nga mapangapinan ang publiko kaangay sang mga estudyante ilabi na sa pagbalik sang face-to-face classes.
Sa idalum sang ordinansa, papanaugan sang 500 pesos ang nagalapas sini para sa first offense, 1000 pesos para sa second offense kag 2,500 pesos para sa third offense ukon pagka preso tubtob 30 ka adlaw depende sa korte.
Nagpasalamat si Distrito sa Alkalde sa pagpili sa iya bilang Vice-Chair sang Task Force.
