Liwat nga nagtipon kaina, Lunes ang hanay sang mga mamumugon sa idalum sang Kilusang Mayo Uno kag nagpatigayon sang piket protesta sa atubang sang Department of Labor and Employment kadungan sang pag abot sa Pilipinas sang pila ka mga miembro sang International Labor Organization (ILO).
Suno kay KMU Secretary General Noli Rosales, ila ginaabi abi ang pag abot sang ILO para sa ila High Level Tripartite Mission ukon fact finding mission angot sa isyu sang “repression” sa mga unyon sa pungsod.
Dugang pa ni Rosales, sa datus sang KMU, nagdangat na sa 56 ka mga lider unyon sa Pilipinas ang ginpamatay samtang 16 naman ka mga lider mangunguma sa isla sang Negros ang ginpatay sa administrasyon ni anay Presidente Duterte.
Ginahangkat man sang grupo ni Rosales ang pamunuan sang DOLE nga magtindog sa ila ahensya kag proteksyonan ang hanay sang mga mamumugon elabi na ang kahilwayan sa pagtukod sang asosasyon kag unyon. | Aksyon Alvin Grava
