Ginaduso ang experimental nga pagbukas sang dugang nga lima ka rota sa Ayala Malls Capitol Central sa Disyembre 2023.
Martes sang aga, sang nagsapol ang Bacolod Traffic Authority Council ukon BTAC kag gin aprubahan ang motion nga naga establisar sang dugang nga rota sa Ayala Malls.
Nalakip sa rota nga ginaduso amo ang halin sa Homesite, Fortune Towne, Alijis, Eroreco, kag Shopping-La Salle.
Ginpahayag ni Patrick Lacson, officer-in-charge sang Bacolod Traffic Authority Office, nagtanyag ang mall sang 3,700 square meters nga terminal sa dalan San Juan ukon sa kilid sang parking area sang mall para sa modernized jeep.
Nagapabor si Lacson sa sini nga proposal ilabi na nga makaserbisyo man ini sa mga magapadulong sa kapitolyo probinsyal, magluwas pa sa mga 5 mil nga empleyado sang Ayala Malls.
Ginpahayag ni Lacson, nga may patigayunon pa nga consultation sa mga transport group kag iban nga stakeholders sa sini nga plano.
Para maduso ang ini nga plano, kinahanglan lamang sang aprubado nga resolution sa Sangguniang Panlungsod.
Madumduman, ginpatuman man sadto ang ini nga traffic experiment sa pila ka rota sa tion sang liderato ni anay BTAO Head Luisito Acebuche.
