Nagapanawagan ang mga Fraternal Brothers sa idalum sang Alpha Kappa Rho Hinobaan Chapter sang hustisya sa kamatayon sang ila upod nga si Ulysses Mahinay alyas bro Esik.
Suno kay Molave Candolisas, adviser sang AKRHO Hinobaan, 14 na ka adlaw humalin nga gintiro patay si Mahinay sa Prk 2, Lawis, barangay Culipapa, wala gihapon natumod sang kapulisan ang suspek kag wala man napasaka ang kaso.
Nagpanawagan man si Candolisas sa posible nakakita sa pagpatay nga magtindog bilang testigo.
Nagapati man si Candolisas sa posibilidad nga may lamod politika ang motibo sa pagpatay bangod naga serbi si Mahinay bilang Political Organizer ni Mayor Ernesto Estrao.
Samtang, natalana nga ipasaka ang kaso murder sa mga suspetsado nga nagpatay sa biktima.
Suno kay PMaj Clifford Batadhay, hepe sang Hinoba-an PNP may gina-uyatan na sila nga ngalan sa mga suspetsado, apang ginahulat pa ang dugang nga ebidensiya batok sa mga ini.
Mapalayag lang ang mga ngalan sang mga suspetsado kun ini ang mapasakaan na sang kaso.
Samtang, suno pa kay Batadhay, apat ka angulo ang ila gina-imbestigar, ini negosyo nga finance sa mga mangingisda, duta, ang pagka-anay kagawad kag politika.
Madumdoman, si Mahinay ginluthang sa gwa sang iya puloy-an sang riding in tandem mga las 9 ang takna sang kagab-ihon.| Aksyon Alvin Grava, Aksyon Bryan Morden