Ginpaidalum ni Bishop Gerardo Alminaza, obispo sang Diocese of San Carlos si Fr. Conrado Mantac sa preventive suspension matapos gin-aresto sa gina-alegar kaso paghimulos sa isa ka dalagita sa syudad sang Sagay.
Sa interview sang Aksyon Radyo Bacolod kay Bishop Alminaza, ginpahayag sini nga iya ginsupendir sa Mantac, agud indi magamit ang iya posisyon para makaimpluwensya sa mga otoridad samtang nagapadayon ang imbestigasyon angut sa ginapangatubang nga kaso.
Ginpahayag man ni Alminaza nga wala sini ginatolerar ang kaangay nga alegasyon kay Mantac bangod daku ini nga sala sa layi kag naga contradict sa pagkapari.
Gin-ako man ni Alminaza, nga ginakasubo sang Diocese of San Carlos, ang pag-aresto kay Mantac, apang ginakilala naman ang kooperasyon sini sa imbestigasyon sang mga otoridad sa pagpati nga magwa ang kamatuoran paagi sa legal nga proseso sang judicial system.
Ginpahayag man ni Alminaza nga indi nila pagpabay-an si Mantac kag ang biktima nga ginatatap sang simbahan. | Aksyon Alvin Grava