Narescue sang otoridad ang kapin pito ka buhi nga mga ido nga ginabakal kag gin alegar tuyo nga ihawon sa Barangay Handumanan, syudad sang Bacolod nagligad nga Mierkules.
Sa interview sang Aksyon Radyo, ginpahayag ni Major Richard Fajarito, hepe sang Police Station 10, na intercept sang isa ka gwardya ang duha ka mga lalaki nga nagamaneho sang tricycle nga wala sang atop kag may karga nga mga ido.
Ginpalab-ot sang security guard ang insidente sa Police Station 10 samtang nakapalagyo ang duha ka mga lalaki.
Suno kay Fajarito, base sa ila natipon nga impormasyon, nagapamakal ang duha ka lalaki sang ido nga nagabalor sang 100 pesos ang kada isa ukon nagapanguha para gin alegar ihawon.
Sa karon, yara sa kustodiya sang Police Station 10 ang tricycle samtang nag mga ido ang gin turnover sa Bacolod City Dog Pound.