Padayon ang kadalag-an sang Bacolod City Police Station 2 sa mas ginpasanyog nga kampanya batuk sa tanan nga sahi sang kriminalidad kun sa diin madamo ang nagkaladakpan nga mga persona nga may nagkalain-lain nga kaso.
Suno kay Police Captain Paul Vincent Pendon, hepe sang Bacolod Police Station 2, anum ang naaresto sa lima ka drug buy-bust operations nga nagresulta sa pagkumpiskar sang 2,104,389 nga balor sang ilegal nga droga nga nagabug-at sang 309.469 gramos.
Naaresto man ang duha ka most wanted person kag isa diri ang MWP sang station level samtang anum naman ang nadakpan nga other wanted persons.
Sa anti-illegal gambling operations 33 ka indibidwal naman ang nagkaladakpan sa 12 ka operations nga gin patigayon.
Nagapasalamat ang hepe sa mga kaupdanan sa wala untat kag dedikado nga pagtrabaho kasubong man sa kooperasyon sang pumuluyo sa area of responsibility sang Police station 2.
Madumduman nga sa ika -120 kag ika- 121 nga Police Service Anniversary Celebration ang Bacolod City Police Station 2 ang nakabaton sang pareho nga pasidungog nga Best Numbered City Police Station kag Best Unit Campaign Against Illegal Drugs Numbered City Police Station Level. | Aksyon Zil Menardo