Matapos ang pila ka tuig, ginbutang na ang portrait ni anay Bacolod Mayor Monico Puentevella sa lobby sang Bacolod Government Center kag ini ang ginpakita sa publiko kaina ang aga Lunes, Agusto 1.
Magluwas kay Puentevella, ginpahamtang man ang portrait ni Bacolod Mayor Albee Benitez kag Congressman Greg Gasataya nga sadto nagserbe nga acting Mayor.
Suno kay Puentevella, malipayon ini nga adlaw para sa iya, sa iya pamilya kag mga supporter.
Para Kay Puentevella, nasakitan ini bangud may mga alkalde sadto nga nagpangalagad sang pila lamang ka bulan pero may portrait sa lobby sang BCGC.
Madumduman, si Puentevella ang nagserbe nga alkalde sang Bacolod sang 2013 tubtob 2016.
Ginpahayag naman ni Mayor Benitez, nga luyag lamang sini nga insaktuhon ang historical facts sang tanan nga nagserbe alkalde sa syudad sang Bacolod.
Madumduman, wala sang portrait si Puentevella sang nagpangalagad ang Leonardia administration.