Plano sang Negros Occidental nga pangabayon ang bulig sang National Bureau of Investigation’s (NBI’s) Bacolod Cyber Crime Division agud maimbestigahan kun sin-o ang persona nga responsable sa pagtawag sa pila ka mga establisemento kag resorts agud magpareserba ukon magpa-bookings usar ang ngalan ni Governor Bong Lacson.
Ini ang ginpahayag ni Provincial Administrator Atty. Rayfrando Diaz II, matapos mabiktima sang peke nga bookings kag reservation ang tatlo ka mga establisamento sa syudad sang Bago kag Silay kag Campuestohan Highland Resort sa syudad sang Talisay.
Apang ginklaro ni Diaz nga iya pa ginahulat ang desisyon sang gobernador kun gusto gid sini nga mahibaluan kun sin-o ang sa likod sang amo nga modus.
Suno kay Diaz, siya mismo nakabaton sang mensahe halin sa isa ka pareho niya nga abugado, nga nagapamangkot kun may reserbasyon ang gobyerno probinsiyal sa Campuestohan nagligad nga Desyembre 1.
Dugang ni Diaz, wala madayon ang transaksyon sang nagpakilala nga si Governor Lacson matapos nga nagpakig-angot sa probinsiya ang staff sang Campuestohan.
Nagligad nga Desyembre 2, may tatlo man ka mga fake bookings nga nabaton ang restaurant sa Bago kag Silay sa diin ang isa sa mga ini ang nakuhaan gid sang balor P4,000 nga cellphone load. | Aksyon Marlon Genovea
