Nag umpisa na ang inisyal nga pagsugilanon sang tatlo ka mga nagdaug nga opisyal nagligad nga Mayo 9 nga eleksyon nga kabahin sang Asenso Bacolod kaupod ang mga telecommunication companies angut sa spaghetti wires sa syudad sang Bacolod.
Ginpahayag ni re-elected Councilor Al Victor Espino, Martes nga adlaw sang nagsapol sila kaupod si Congressman Greg Gasataya kag Councilor-elect Jude Thaddeus Sayson kaupod ang mga tiglawas sang telco companies.
Suno kay Espino, ini ang kabahin sang promisa ni Mayor-elect Albee Benitez nga kuhaon ang mga spaghetti wires sa syudad. Dugang pa sang Konsehal, ginpaathag sa ila ini nga mga wire ang transmission line sang mga telco nga naga angut sa mga poste sa CENECO.
Suno pa kay Espino, ginapaabot nga himuson sang mga telco ang mga spaghetti wires para sa safety sang publiko kag ang importansya sang internet connectivity nga karon nakadepende ang mga pumuluyo sa ila nga trabaho kag iban pa.
Nahibaluan nga kalabanan sa mga wire ang wala na ginausar bangud iban ang naga gamit na sang fiber optics sa pag transmit sang data.
Suno kay Espino, may posibilidad man ang underground cabling apang ini ang nagakinahgnlan sang malawig nga tion kag dako nga resources.
Target nga unahon ang mga spaghetti wires sa dalan Lacson kag Araneta.
Ginklaro ni Espino nga ang pagsinapol base sa pribado nga inisyatibo kag indi pa parte sang ila official function bilang napilian nga mga opisyal sang syudad.