Apektado si Bacolod Councilor Dindo Ramos sa natabo nga pagwa ni Councilor Al Victor Espino sa Grupo Progreso, nga ginapamunuan ni Mayor Bing Leonardia.
Si Ramos ang kilala nga abyan ni Espino kag madugay nga nag updanay sa politika samtang si Leonardia naman ang iya ginupdan sang nagsugod ang iya karera sa politika.
Sa interview sang Aksyon Radyo Bacolod, ginpahayag ni Ramos, nabudlayan ini bangud halin sadto updanay sila ni Espino sa pagpangampanya. Ginpahayag sang Konsehal, nga wala ini nakabati sa istoryahanay sa tunga ni Espino kag ni Leonardia nagligad nga Setyembre 3 sang gab-i sang nagsapol ang Grupo Progreso bangud ini ang nagpalayo.
Suno kay Ramos, iya ginarespeto ang desisyon ni Espino kag ni Leonardia angut sa natabo sa partido. Suno pa sa Konsehal, magapabilin ini sa GP kag wala ini sang may nakit-an nga rason para magbuya sa partido.
Sa nahibaluan, una nga ginpalayag ni Espino nga ginpagwa siya sa partido matapos nga ginhambalan ni Leonardia nga nadula ang iya pagsalig samtang nanindugan si Leonardia nga boluntaryo nga naghalin sa GP ang konsehal.