Plano sang lokal nga gobyerno sang San Carlos City, Negros Occidental nga magpatukod sang ‘one-stop-shop’ sa sulod sang pwerto sang syudad, agud mangin komportable para sa mga pasahero ilabi na sa tion sang tig-ululan.
Ini ang ginpahayag ni Mayor Renato Gustilo sa meeting sang Port Management Advisory and Port Facility and Security Councils upod ang nagkalain-lain nga national agencies kag stakeholders, sa SCC Multipurpose Hall, Brgy. 3, nagligad nga Marso. 17.
Ini nga plano ang ginpaboran ni Philippine Ports Authority (PPA) Negros Occidental Acting Manager Engr. Rodel G. Lagmay. Ang sinapol may kaangtanan sa PPA Administrative Order No. 04-2006 Revised Guidelines sa Operation sang National Port Advisory Council (NPAC).
Ginhambalan man ang preparasyon sa OPLAN Semana Santa kun paano akomodahon ang ginaantisipar nga pagdagsa sang mga pasahero kag security measures nga pagahimuon sa koordinasyon sang local PNP, Philippine Coast Guard kag PPA port police.
Gindiskusyonan man sang council ang report nga pagkompra sang pila ka mga indibidwal sa mga tickets, kag pagbaligya sa mas mahal nga presyo sa mga pasahero sa tion sang peak season.
Ini nga problema ang naresulbar na sang shipping lines paagi sa pag-obligar sa mga individuals nga magsumiter sang IDs antis magbakal sang tickets sa ticketing office. | Aksyon Marlon Genovea
