Nagpirmahanay sang kasugtanan ang lokal nga gobyerno sang EB Magalona, kag Philippine Ports Authority (PPA) para sa pagpatukod, pagdumala, kag pag-operar sang proposed Saravia Municipal Port sa Barangay Tuburan, banwa sang EB Magalona.
Ang pagpirma ginpatigayon sa Asenso Hall plaza publika, paagi kay Mayor Marvin Malacon, kag acting port manager sang PPA Port Management Office (PMO) Negros Occidental nga si Engr. Rodel Lagmay.
Suno kay Malacon madugay na nga plano sang iya administrasyon nga mabalik ang daan nga pwerto sa Brgy. Tuburan, umpisa sang tuig 2016.
Bangud sini, ang EB Magalona ang may duha na ka mga pwerto, sa diin ang una nga subong gina-operar sang pribado nga kumbuyahan ang nahamtang sa Barangay Manta-angan.
Ang Saravia Municipal Port amo ang pinakauna nga pwerto sa E. B. Magalona nga dumalahanan sang gobyerno nasyonal.
Suno naman kay Lagmay iya iga-tugyan ang memorandum of agreement (MOA) sa PPA Board of Directors para sa technical evaluation, kag mapondohan sa masunod nga tuig.
