SENIOR CITIZEN NGA NAGATABOK SA PEDESTRIAN LANE, PATAY SANG NABUNGGUAN SANG TAXI

Share on facebook
Share on google
Share on pinterest
Share on twitter
Share on print
(Police Station 3 Photo)

Ginbawian sang kabuhi sa hospital ang senior citizen matapos nga nabungguan sang taxi sa may dalan Lacson sa atubangan sang Union Bank, sa Barangay Bata, syudad sang Bacolod takna las 5:40 sang kaagahon, kahapon, Biernes nga adlaw.

Ang biktima ang ginkilala nga si Susana Franco, 74 anyos, residente sang Barangay III, syudad sang Silay.

Suno kay PSSg. Richard Dema-ala, traffic investigator sang Police Station 3, nagpanaug ang biktima sa jeep halin sa syudad sang Silay kag nagtabok sa pedestrian lane sang nabungguan sang taxi halin sa Sur padulong Norte nga direksyon.

Ginkilala ang taxi driver nga si Mario Mateo, 60 anyos, residente sang Zone IV-A, syudad sang Talisay.

Ginpahayag ni Dema-ala, ang biktima ang iya pa naistorya sa lugar sang insidente nga kuntane mag pa booster shot, pero ini ang ginbawian sang kabuhi takna las 8:43 sang aga sa isa ka pribado nga hospital.

Suno kay Dema-ala, gin release ang suspek matapos nga wala sang kaso nga napasaka batuk sa iya matapos nag lapse ang 18 oras nga reglementary period.

Nagahulat pa ang Police Station 3 sa desisyon sang pamilya sang biktima kon may aregluhanay nga matabo ukon magpasaka sang kaso.

What’s your Reaction?
+1
0
+1
0
+1
0
+1
1
+1
0
+1
0
+1
3

COMELEC BACOLOD MAGAKUHA SANG 110 KA DESO TECHNICAL STAFF

Magakuha ang Comelec Bacolod sang 110 ka mga DESO Technical Staff sa maabot nga Mayo 9, 2022 nga eleksyon.

Ang DESO Technical Staff amo ang in charge sa paghatag sang Vote Counting Machine Technical Support kag pag assist sa electoral board ukon EBs.

Suno kay Acting Bacolod Election Officer Atty. Revo Sorbito, kaina sang aga Enero 24 may exam nga ginpatigayon sa duha ka batch sang mga applikante para sa amo nga posisyon samtang sa Enero 26 ang isa pa ka schedule sang exam.

Dugang pa ni Sorbito, mas luyag nila nga magkuha sang mga manunudlo bilang DESO Technical Staff kag bukas man sa iban nga aplikante ilabi na ang may ihibalo sa computer.

Samtang, nakabaton na sang go signal ang Comelec Bacolod gikan sa Comelec sa probinsya sa pag release sang listahan sang mga botante sa mga nagapangabay nga mga aspirant.

Suno kay Sorbito, iban sa mga nagapangabay ang nagbilin sang flash drive sa ila opisina kag amat-amat na nga gina asikaso sang mga personnel sang Comelec.

Ang Bacolod City ang may masobra 320 mil ka mga registered voters sa Mayo 9, 2022 nga piniliay.

Samtang, ginpahayag ni Sorbito, nga sa Comelec Central Office na kinahanglan nga ipa register sang mga aspirant ang ila mga official social media accounts.

Ang mga aspirant ang ginhatagan tubtob Enero 31, 2022 para mag pa register sa Education and Information Department (EID).

Sa pihak nga bahin, ginpahayag ni Sorbito, nga padayon pa sini nga ginatipon kag gina-address ang mga concern, kasunod nga tinalikdan nga semana lang ini nagpungko bilang acting election officer sang Comelec Bacolod.

What’s your Reaction?
+1
0
+1
0
+1
0
+1
0
+1
0
+1
0
+1
0

20.4M NGA BALOR SANG SUSPECTED SHABU NAKUHA SA DUHA KA BYAHERO

Narekober ang tatlo ka kilo sang ginasuspetsuhan shabu nga nagabili sang 20.4 milyones pesos sa duha ka mga Maranao nga nagsakay sa Roll-on Roll-off (RoRo) vessels padulong sa syudad sang Bacolod kaina sang udto, Lunes.

Ang mga nadakpan ginkilala sanday Aslani Disomangcut Usman, 38 anyos kag Jalane Mohammad Ambulo, 32 anyos nga pareho tumandok sang Marawi, Lanao Del Sur.

Suno kay PDEA-Negros Occidental Agent Bamboo, nagapatigayon sang regular nga profiling kag paneling ang mga personnel sang PDEA sang na-detect sang isa sa ila K9 ang salakyan nga may unod sang illegal drugs.

Nakuha sa compartment sang salakyan ang tatlo ka putos nga may unod sang ginasuspetsuhan shabu.

Narekober man sang kapulisan ang duha ka touchscreen mobile phones kag personal ID sang mga suspetsado.

Bangud sang narekober nga ginasuspetsuhan shabu, ginakabig ang mga nagkaladakpan nga high value individuals.

Ginpanginwala naman sang mga nadakpan nga ila ang mga ginasuspetsuhan shabu.

Sa pagsaysay ni Ambulo sa Aksyon Radyo Bacolod, ginpahulam lamang sang iya abyan nga residente sang Metro Manila ang salakyan matapos sini mahibaloan nga magapauli sila sa Marawi.

Aligasyon pa ni Ambulo, masami na nila nga alagyan ang syudad sang Bacolod kun magpauli sa Marawi bangud nga nagalabay sila sa ila mga kakilala sa Barangay 31, sa syudad sang Bacolod.

Dugang pa ni Ambulo, wala man ini sang ideya nga may nakatago nga droga sa compartment sang salakyan. Palayag pa ni Ambulo nga sa online lamang gid sila nagkilalahay sang persona nga nagpahulam sa ila sang salakyan.

Ginkumpirmar ni Philippine Coast Guard-Negros Occidental Commander Captain Ludovico Librilla nga ang grupo nanday Usman kag Ambulo ang madugay na nga gina-surveillance sang otoridad.

Dugang pa ni Librilla, basi sa impormasyon gikan sa mga confidential informant, makatatlo na ka beses nga nagabalik-balik sa syudad sang Bacolod ang mga suspetsado.

Nagpasalamat naman si Librilla sa kooperasyon sang publiko sa paghatag sang mga impormasyon sa PCG. | Aksyon John Diaz

What’s your Reaction?
+1
0
+1
0
+1
0
+1
0
+1
0
+1
0
+1
0

MORE STORIES:

LIKE US ON FACEBOOK

error: Ooops... You are not authorized to copy this content.