Patay ang isa ka senior citizen matapos gin-atake sa kurason bangud sang asud-asud pagpalupok sang armas-luthang sa Hda. De Agua, Brgy. Cubay, syudad sang La Carlota sadtong Enero 21 sang gab-e.
Ang napatay ang ginkilala kay Nador Guitguit, 66 anyos, kasado kag residente man sang Brgy. Cubay, sa amo nga syudad.
Suno kay Police Lt. Col. Lowell Garinganao, hepe sang La Carlota City PNP, nakabati sang nilupok sang armas si Guitguit kag siya ang kinulbaan tubtob nga gin-atake sa kurason kag nabudlayan maginhawa.
Ginhingagaw pa nga madala sa Don Salvador Benedicto Memorial District Hospital sa syudad sang La Carlota si Guitguit apang siya ang gindeklarar nga dead on arrival ni Dr. Joel Stephen Auguis.
Dugang pa ni Garinganao, ang pagpalupok sang armas ang nagluntad malapit sa balay ni Guiguit kun sa diin may nagakinanta kag nagasinadya.
Si Romel Maquilat, 39 anyos, isa ka farm manager kag residente sang Hda. Rodriguez, Brgy. Camangcamang, banwa sang Isabela, amo ang suspek sa krimen.
Matapos ang pagpalupok sang iya nga armas, nagpanago si Maquilat sa iya nga kwarto kag naglapaw isa ka oras ang negosasyon antis siya nagsungka sa kapulisan.
Ginpanginwala sang suspek nga nagpalupok siya sang armas.
Suno kay Garinganao, gina-aligar ni Maquilat nga palupok lamang ang gingamit sini agud sawayon ang mga nagaginahod sa ila nga lugar.
Apang, sa imbestigasyon sang kapulisan, gin-pahayag sang mga saksi nga armas gid ang gingamit ni Maquilat kag gintaya pa niya ini sa babaw.
Sa karun, ginapaidalom sa paraffin test si Maquilat agud mahibalon kun nagpalupok siya sang armas.
Kaso nga alarm and scandal ang ginpasaka sang kapulisan batuk kay Maquilat nga karun nagapabilin sa custodial facility sang La Carlota City PNP.
Samtang, wala pa natumod sang kapulisan kun mapasakaan sang kaso si Maquilat may angut sa kamatayon sang senior citizen nga nagapanindugan nga ang pagpalupok niya sang armas ang ginkamatay sang biktima. | Aksyon John Diaz
