Na identify sang syudad sang Bacolod ang 22 tanan ka mga ‘critical areas’ nga ginbaha kasunod sang pagbunok sang ulan kahapon, Lunes nga adlaw, Okrubre 3.
Ini ang natumod paagi sa ginpatawag nga pagsinapol ni Mayor Albee Benitez kaupod ang DPWH, Bacolod CDRRMO, City Engineer’s Office kag si Vice Mayor El Cid Familiaran kaina sang aga, Martes.
Ini nga mga lugar ang makit-an sa Hi-Strip, SM City, Brgy. 12, Burgos-Hilado St., Downtown Area , Gonzaga Subd., Brgy. Villamonte, Libertad Public Market, Central Market, Lacson-Hernaez St., Rosario-Mabini St., Gonzaga-Lopez Jaena, Luzuriaga-Gatuslao St., Gonzaga-Mabini St., Lopues East, Lupit River, Brgy.40, Mandalagan River, Sta. Ana, Brgy. 31, J.R. Torres, Gatuslao-Hernaez St., Mabini-Libertad St., Hernaez St. malapit sa Cokin Bldg., Magsaysay sa Flyover kag Magsaysay – Lacson St.
Ginpahayag ni Dr. Anna Maria Laarni Pornan, head sang CDRRMO, naghimo sila sang short-term kag long term solutions para ma solusyunan ang problema sa baha.
Ang short term plans ang ginalakipan sang pag-ilis sang manhole cover nga mangin steel grating type, declogging sang drainage systems, pagpadako sang water inlets, pagpalapad sang opening sang mga catch basins, pagpatuman sang maayo kag strikto nga pag-implementar sang -pagkuha kag paghaboy sang basura sa mga barangay, kag paghatag sang pahibalo sa mga stakeholder.
Ginpahayag ni Pornan, nga para sa long-term plan, may ipahamtang nga mga diversion channels para dire ma release ang tubig kag magapakig-angut man ang syudad sa DPWH Bacolod District Engineering Office bangud kalabanan nga proyekto ang napaidalum sa sini nga ahensya.
Natalana pa liwat nga magasapol ang natungdan nga mga opisina para maplastar ang mga solusyon sa pagbaha.
