Nalakip bilang finalist sang National Outstanding SK Council ang Sangguniang Kabataan sang Barangay Villamonte.
Suno kay Barangay Villamonte SK Chairman Shaine Solidum, pila sa mga ginabasehan agud malakip bilang finalist amo ang mga portfolio nga ila ginpasa kon diin nagapakita sang ila mga hinimuan kag programa para sa mga kabataan sa barangay nga ila nasakupan.
Dugang pa ni Solidum, ginatan-aw man ang “efficiency” kag “effectivity” sang SK council agud makabig nga outstanding SK Council.
Nahibaluan, sa bug-os nga syudad sang Bacolod kag probinsya sang Negros, ang SK sang barangay Villamonte lang ang nakasulod bilang finalist.
Samtang, national finalist man sa health category ang “Project SAFE” sang SK sang Barangay Villamonte.
Gintalana sa masunod nga semana ang awarding nga pagahiwaton sa isla sang Boracay.
Una na nagpasar sang resolusyon ang Bacolod SP nga nagapanginbulahan sa sini nga pagkilala sang ni Solidum kag sang SK Council sang Villamonte.
Samtang, Yara na sa ikaduha nga reading ang ginaduso nga barangay ordinance sang Sangguniang Kabataan sang Barangay Villamonte nga tuyo mahatagan sang scholarship ang mga estudyante sa ila barangay.
Suno kay Solidum, tuyo sini nga magpa-in sang pondo ang barangay para sa scholarship sang mapili nga mga benepisyaryo bisan pa lain na ang administrasyon.
Dugang pa, may yara sila karon nga financial assistance community education nga programa kon diin may 250 ka mga scholars nga nagabaton sang 3,000 pesos kada semester ukon 6,000 pesos sa bilog nga school year.
Ginpahayag ni Solidum nga iban nga mga scholars ang nag graduate na sa bulig man sang sini nga programa.
