Gin aprubahan sang Sangguniang Panlungsod sa Bacolod ang pag amyenda sang ila nga internal rules matapos nga pito ang nag pabor samtang apat ang nagpamatok sa regular session, Myerkules.
Ang mga nagpamatok amo sanday Councilors Renecito Novero, Em Ang, Israel Salanga kag Cindy Rojas.
Nagpabor naman sanday Councilors Al Victor Espino, Jason Villarosa, Simple Distrito, Pao Sy, Vladimir Gonzales, Celia Flor kag Jesus Claudio Puentevilla.
Sanday Councilors Ayesha Joy Villaflor kag Lady Gles Palen ang wala nakatambong sa session bangud yara sa official trip samtang si Councilor Jude Thaddeus Sayson ang nag serbe nga presiding officer bilang Acting Vice Mayor.
Ginpahayag ni Espino, lakip sa amendment ang pag sumiter sang tanan nga agenda tubtob las 12 sang udto sa kada Martes nga adlaw sa kada semana mag luwas sa mga agenda nga gin certify nga urgent sang City Mayor’s Office.
Gin consolidate naman ang pila ka mga komitiba nga nag resulta sa 28 ang nabilin humalin sa 32 ka mga komitiba.
Suno kay Espino, may yara sang Ordinance Day, ukon pagatalakayon ang mga ordinansa sa una nga kag ikatatlo nga semana sa kada bulan, kag wala sang ordinansa nga talakayon sa ikaduha kag ikaapat nga semana magluwas kon ini ang urgent.
Ini naman sakop sa Ordinance Day ang mga proposed ordinance nga yara pa lamang sa first reading.
Gin amyendahan man ang polisa angut sa committee chairmanship nga tanan nga miembro sang SP ang dapat may yara sang chairmanship, vice-chairmanship kag membership, ini indi parehas sa tinalikdan nga council nga kada isa ang may kapin tig duha ka mga komitiba.
Nagpabutyag sang pagpamatok ang apat ka mga Konsehal sa idalum sang Grupo Progreso sa pila ka amendment sa internal rules.
Ginpahayag ni Councilor Renecito Novero, nga dapat kuntane alalangay nga gintunga ang mga komitiba kaangay sang tinalikdan nga council.
Ginklaro ni Novero nga indi sila opposition pero kabahin lamang sang pihak nga partido kag wala man nagapamatok sa mga proyekto sang syudad.
Ginkwestyon ni Councilor Em Ang ang ‘ordinance day’ kag nagpahayag nga tuyo sang ila trabaho kuntane nga mapadasig ang mga legislative agenda.
Ginkwestyon man ni Councilor Cindy Rojas ang ordinance day ilabi na nga may kabudlayan sila karon sa pag pa schedule sang public hearing sa session hall.
Parehas man ang sentemyento nga ginpabutyag ni Councilor Israel Salanga sa pila ka amendment.
Ginpahayag ni Councilor Al Victor Espino, nga pwede man nga ma akomodar ang mga agenda angut sa ordinansa kon ini ang urgent.
