Pasakaan sang kaso ang tatlo ka mga suspetsado nga nagkawat sang duha ka unit sang cellphone sang Bise-alkalde sa syudad sang Kabankalan kahapon, Agosto 2.
Suno kay Police Lt. Jomel Salarda, Deputy Chief of Police sang Kabankalan City PNP, ang kapulisan ang mapasaka sang kaso batuk sa mga suspetsado nga sanday Wowie Uy, 30 anyos sang Brgy. Tabao, banwa sang Valladolid; Melvin Cosio, 34 anyos kag Rose Linao, 31 ang edad nga pareho naman residente sang Barangay Mambulac syudad sang Silay.
Ang biktima naman nga si Vice-Mayor Miguel Zayco ang maga-serbi nga saksi sa kaso.
Ang tatlo ka mga suspetsado amo ang nagkuha sang duha ka cellphone ni Zayco nga tanan nagabalor sang 130 mil ka pesos.
Si Zayco ang nagatambong sa Charter Day Anniversary celebration sang syudad sang gin-snatch ang iya nga mga cellphones.
Pagpahayag naman ni Salarda, ang tatlo ka mga suspetsado ang indi kabahin sang isa ka organisado nga grupo nga nagapangawat sa Southern Negros.
Samtang, sa iya nga statement, nagpasiguro naman si Kabankalan Mayor Benjie Miranda nga mapasakaan sang kaso ang tatlo ka mga suspetsado kag siguruhon nga indi na maliwat pa ang kaangay nga krimen. | Aksyon John Diaz
