Dakop ang tatlo ka mga persona matapos maaktuhan nga nagapangawat sang kable sang telecommunications company sa atubang sang Development Bank of the Philippines, dalan Lacson Barangay 9 syudad sang Bacolod pasado la 1 sang kaagahon, Enero 12.
Ang mga nadakpan ang ginkilala nga sanday Charlie Caldea, 28 anyos; Christopher Uy, 37 anyos kag Elias Grajo, 21 anyos tanan residente sang Purok Tuboran Barangay Mandalagan, sa amo man nga syudad.
Suno kay Police Captain Jonito Pastrana, hepe sang Police Station 2, samtang naga-roving ang patrol sang kapulisan naaktuhan nga gina-utod sang mga suspek ang kable.
Ginkawat sang mga suspek ang napulo ka metros nga kalabaon sang 600 pairs Innove Globe Copper nga nagabili sang 68 mil ka pesos kag 15 metros sang 200 pairs innove Globe Copper wire nga nagabili naman sang 37 mil ka pesos.
Pagpahayag ni Pastrana, antis nadakpan ang tatlo ka mga suspek, nagpapanaug na sang direktiba si BCPO Director Police Col. Thomas Joseph Martir nga i-activate ang “Globe Bantay Kable”.
Dugang pa sang hepe, madamo naman nga telcos ang nagareklamo sa PNP nga madamo nila nga kable ang gina-utod kag ginakawat.
Ang tatlo ka mga kawatan ang ginpasakaan na sang kaso nga theft kag karun nagapabilin priso sa custodial facility sang Police Station 2. | Aksyon John Diaz
