Arestado ang tatlo ka mga lalaki matapos ila ginkawat ang isa ka motorsiklo pasado la 1:45 sang kaagahon, Agosto 3 sa Purok 1,Brgy. Minoyan banwa sang Murcia.
Ang mga suspetsado amo sanday Jude Nobles, 18 anyos sang Purok Paho, Brgy. San Miguel; Christian Kent Alindog, 18 anyos sang Purok Arceo, Brgy. Minoyan kag isa ka 16 anyos nga lalaki nga residente man sang Brgy. Minoyan tanan sang banwa sang Murcia.
Suno kay Police Captain Marc Joeil Reclamado, nalabyan sang tatlo ka mga suspetsado sa garahe ang motorsiklo nga ginapanag-iyahan ni Jonabel Fernando, 41 anyos.
Dugang pa ni Reclamado, nakita sang mga suspetsado nga yara pa ang yabi kag nagdesisyon sila nga sakyan kag i-maneho ini.
Nadakpan ang tatlo ka mga suspetsado sang pila ka mga saksi sa bahin sang Purok Narra, Brgy. Lopez Jaena.
Aminado naman ang tatlo ka mga suspek nga nakainom sila sang makahulob nga ilimnon antis natabo ang pagkawat sang motor.
Priso karun sa custodial facility sang Murcia Police Station ang tatlo ka mga suspetsado kag natalana nga pasakaan sang kaso nga motornapping. | Aksyon John Diaz