TATLO NADAKPAN SA PAGPAMEKE SANG VACCINATION CARD

Share on facebook
Share on google
Share on pinterest
Share on twitter
Share on print

Nakumpiskar ang 15 ka mga peke nga vaccination cards gikan sa mag-iloy kag isa pa ka babaye sa entrapment operation sang Bacolod City Police Station 1, Bacolod City Health Office kag Bacolod City Emergency Operations Center sa dalan Cuadra-Locsin, Brgy. 24 syudad sang Bacolod subong nga gab-i, Lunes.

Ang subject sang entrapment operation ang ginkilala kay Loreza Funela, legal ang edad.

Dakop man ang mag-iloy nga ginkilala sanday Ivan Joros, 18, kag Marivic Joros, 44 ang edad nga pareho residente sang Barangay Villamonte.

Suno kay CHO Officer-in-Charge Dr. Edwin Miraflor, kaina sang hapon sang nakabaton sang report ang EOC sa Ayala Capitol Central nga may nga persona nga nagabaligya sang peke nga vaccination card.

Ang mga peke nga vaccination card ang ginabaligya sang kapin 500 pesos tubtob 1800 pesos.

Nagpakig-angut sa kapulisan ang EOC kag nagpatigayon sang imbestigasyon.

Nakumpiskar sang mga otoridad sa tatlo ka mga suspetsado ang 15 ka peke nga vaccination cards, 6,000 ka pesos nga kwarta, pito ka peke nga vaccination certificates, isa ka laptop kag isa ka printer.

Kaso nga paglapas sa layi nga nagadumili sa pagpeke sang mga pampubliko nga dokumento COVID-19 Vaccination Act of 2021 ang paga-atubangon nga kaso sang mga nagkaladakpan.

Suno kay Bacolod EOC Volunteer Dr. Chris Sorongon, mahimo nga ma download sa online ang format ang vaccination card nga gina-release sang syudad sang Bacolod sa mga nabakunahan bangud nga ini ang gikan sa Department of Health.

Dugang pa ni Sorongon, sang nagsugod ang vaccination program sang gobyerno madamo naman ang nag-abusar kag nagatanyag sang peke nga vaccination card kag ila naman ini napaandam.

Ginpahayag pa ni Sorongon, ginagamit man sang mga suspetsado ang mga naisyu na nga vaccination card agud himuon basihan sa pagbutang sang mga ngalan kag perma sang mga nurses kag doktor.

Nagapati naman si Sorongon nga may kaupdanan pa ang tatlo ka mga nadakpan. | Aksyon John Diaz

What’s your Reaction?
+1
1
+1
0
+1
1
+1
1
+1
0
+1
0
+1
0

MORE STORIES:

LIKE US ON FACEBOOK

error: Ooops... You are not authorized to copy this content.