Nagapadayon sa pagbaton sang mga watchers sang Corazon Locsin Montelibano Memorial Regional Hospital ang temporary shelter nga gintukod sang Barangay 18, sa syudad sang Bacolod.
May 40 ka mga indibidwal nga nagatinir subong sa shelter nga nahamtang sa 2nd Cordova Road. Suno kay Kapitan Madeline Diaz, libre ang pag-istar sang mga watchers sa temporary shelter kag wala naman sila nagabayad sang kuryente kag tubi.
Personal nga kwarta ni Diaz kag Kagawad Jonathan Diaz Jr ang ginabayad sa kuryente kag tubi bangud suno sa kapitan indi naman ini responsibilidad sang barangay.
Suno kay Diaz, halos tanan nga nagatinir sa shelter ini taga Bacolod.
Samtang ang bayad naman sa renta sa duta ang bayad tubtob sini nga bulan sang Mayo.
Ginapaligban subong ni Diaz ang pagasyluhan sang shelter sa tion nga magtapos na ang kontrata sa sini nga bulan.
Sa pihak nga bahin, ginkumpirmar naman ni Incoming 5th District Congressman Dino Yulo nga nakapangita na siya sang isa ka balay nga pagahimuon temporary shelter sang mga watchers.
Sa subong, ginasuguran na ang pagkay-o sang balay agud magamit sa mas madali nga panahon.
Samtang, may pangabay si Diaz sa mga indibidwal nga imbes magbulig ginapa-arkilahan pa ang mga gamit sa mga watchers sang pasyente.
Suno kay Diaz, nakabaton siya sang impormasyon kahapon sang aga (Mayo 19) nga may nagapa-arkila sang bangko, folding bed kag iban pa nga gamit sa mga watcher sa gwa sang ospital.
Nagabalor 20 tubtob 150 pesos ang arkila.
Ang punto ni Diaz, kun mahimo buligan ang mga watchers kag indi na pagpabayaron pa bangud nga dako man ang ginagasto nila sa ospital. | Aksyon John Diaz