Arestado ang Top 2 sa drugs watchlist sang Silay City PNP sa ginpatigayon nga buy bust operation pasado las 6 kagab-e, Hunyo 22, sa Zone 5, Barangay Mambulac, syudad sang Silay.
Ang suspetsado ang ginkilala kay Sharon Pelaez alyas Eric, 45 anyos kag residente sang Barangay Mambulac, syudad sang Silay.
Suno kay Police Lt.Col. Robert Petate, hepe sang Silay City PNP, binulan na nga ginamonitor si Pelaez bangud ini ang gina-angut sa iban nga mga drug personality nga nadakpan na sang kapulisan.
Sa ginpatigayon nga buy bust operation, narekober ang 11 ka sachet sang ginasuspetsuhan shabu nga nagabug-at sang 15 gramos kag nagabili sang 102 mil ka pesos; mga drug paraphernalia kag 600 pesos nga buy bust money.
Si Pelaez ang ginakabig man nga street level individual.
Dugang pa ni Petate, gin-aligar man ni Pelaez nga sa syudad sang Bacolod ang source sang iya ilegal nga droga.
Kaso nga paglapas sa layi nga nagadumili sa pagbaligya kag paghupot sang ilegal nga droga ang ipasaka batuk kay Pelaez nga priso karun sa custodial facility sang Silay City PNP. | Aksyon John Diaz
