Arestado ang Top 4 sa drugs watchlist sang Talisay City PNP sa ginpatigayon nga buy-bust operation sa Purok Alusiman, Barangay Zone 12-A, syudad sang Talisay pasado las 8 kagab-e, Hunyo 21.
Ang nadakpan ang ginkilala kay Dairyl Akol, 33 anyos, isa ka street level individual kag residente sang Hacienda Minuluan, Barangay Matab-an, syudad sang Talisay.
Suno kay Police Lt. Marion Vicente Buenaflor, Chief sang Station Drugs Enforcement Team sang Talisay City PNP, tatlo ka semana nga ginmonitor sang kapulisan si Akol antis natigayon ang buy bust operation.
Si Akol ang ginatudlo nga ginakuhaan sang supply sang droga sang iban nga nagkaladakpan sang Talisay City PNP.
Narekober kay Akol ang lima ka sachet sang ginasuspetsuhan shabu nga nagabug-at sang duha ka gramos kag nagabili sang masobra 13, 000 pesos; 870 pesos nga kwarta kag isa ka magamay nga plastic container.
Priso karun si Akol sa custodial facility sang Talisay City PNP kag pasakaan sang kaso nga paglapas sa layi nga nagadumili sa pagbaligya kag paghupot sang ilegal nga droga. | Aksyon John Diaz
