Wala sang may nabaton nga datus ukon dokumento ang transition team ni Mayor-elect Albee Benitez angut sa listahan kag kadamuon sang mga job order workers sa idalum sang Leonardia administration.
Sa preparatory meeting sang duha ka transition teams, Hunyo 22, ginpamangkot ni anay Councilor Caesar Distrito, miembro sang transition team ni Benitez, ang listahan sang mga JO nga gin hire humalin Enero tubtob Hunyo 2022.
Suno kay Distrito, luyag kuntane ni Benitez nga hatagan sang prebilihiyo ang mga JO nga madugay na nga nagatrabaho kag mapabilin sa ila nga pwesto pero indi ini maplastar bangud wala sila sang may gina uyatan nga datos.
Pero suno kay Distrito, nagakooperar man ang transition team sang outgoing administration mag luwas lamang sa isyu sang JOs.
Sa karon, suno sa anay konsehal, magahulat sila sang kopya sang dokumento nga ila ginapangayo kag kon indi mahatag, ang transition team ang magapakigangut sa natungdan nga department head.