Patay ang isa ka lalaki sa aksidente nga nagluntad sa Hacienda Bibiana, Barangay E Lopez sa syudad sang Silay las 4 kahapon sang kaagahon, Enero 24.
Ang biktima ginkilala kay Caesar Jaena, 42 anyos kag residente sang Purok Sampaguita, Barangay E. Lopez sa amo man nga syudad.
Suno kay Police Executive Master Sergeant Joemarie Lachica, imbestigador sang Silay City PNP, nagasundanay ang karo nga ginasakyan ni Jaena kag ang trak nga ginamaneho naman ni Rene Ramoran, 39 anyos kag residente sang Barangay Capitan Ramon sa amo man nga syudad.
Nasagaid sang trak ang kilid sang karo kag ini ang nagbaliskad kag nagderetso sa kalog.
Pagpahayag ni Lachica, mahimo wala makita ni Ramoran ang karo bangud nga dulom ang dalanon kun sa diin nagluntad ang aksidente.
Pilas sa ulo ang naangkon ni Jaena nga gintunaan naman sang iya nga kamatayon.
Suno naman kay Lachica, nag-areglohanay na ang pamilya sang biktima kag ang suspetsado kag pagkatapos sang 18 ka oras nga reglimentary period gin-release na si Ramoran. | Aksyon John Diaz
